AL DEBBO (1924-2011)

Die geliefde Al Debbo met sy skreeusnaakse gesigsuitdrukkings en kwinkslae was ’n legendariese akteur, komediant en sanger.

Al Debbo se pa, Azar, was ’n spoorwegwerker. Hy het in die vroeë 1900’s uit Libanon hierheen geïmmigreer en hulle het hulle in Bloemfontein gevestig waar Al op 22 Junie 1924 gebore is.

Al Debbo laat vaar sy loopbaan as ’n ambagsman om voltyds te sing en toneel te speel. Hy is bekend vir tydlose liedjies soos “Sonbrilletjies”, “Hasie”, “Tantes van Nantes”, “Brakke van Turffontein” en “Bolandse nooientjie”, en het altesaam in twintig rolprente gespeel.

Toekennings

Hy ontvang in 1999 ’n toekenning van die ATKV vir sy lewenslange bydrae tot Afrikaanse vermaak. In 2005 ontvang hy ’n SAMA-toekenning vir lewenslange bydrae.

Hy ontvang in 1999 ’n toekenning van die ATKV vir sy lewenslange bydrae tot Afrikaanse vermaak. In 2005 ontvang hy ook ’n SAMA-toekenning vir lewenslange bydrae.

Die SA Akademie se eeufeesmedalje is in 2009 tydens die eeufeesvierings aan hom toegeken as erkenning vir sy jarelange toewyding as kunstenaar wat oor dekades in Afrikaans opgetree het.

Hy is op 13 Julie 2011 op 87-jarige ouderdom oorlede in ’n hospitaal in Bloemfontein, nadat hy drie weke tevore vir ligte longontsteking opgeneem is. Hy is ook vir hartversaking behandel.

Hy en sy vrou, Ansa het twee seuns gehad, Alec en Azar. Sy kinders uit sy eerste huwelik was Alvin, Margie, Melody, Bonnita en Diane.

deur Christof Greyling